Ég er formaður Menningar- og ferðamálaráðs. Þannig að ég hef einbeitt mér undanfarið að þeim málum.

Margt hefur áunnist. Þátttaka almennings í menningarviðburðum hefur aukist verulega og fleiri heimsækja söfnin og taka þátt í menningarviðburðum nú en áður. Annar stór áfangi er endurskoðun menningarstefnu borgarinnar sem hefur bætt yfirsýn okkar yfir málaflokkinn. Menning er mun breiðara hugtak en einungis listir. Að eiga framúrskarandi listamenn er auðvitað gífurlega mikils virði en menningarmálin snúast um mjög fjölbreytta hluti, allt frá mannlífi í borginni yfir í að styrkja einstaka listviðburði. Ferðaþjónustan er vaxandi atvinnugrein og nú erum við byrjuð að endurskoða ferðamálastefnuna. Menningar- og ferðamálin tengjast að sjálfsögðu. Í Reykjavík er gróskumikið tónlistarlíf sem í felast mikil tækifæri. Ferðamenn velja áfangastaði út frá áhugamálum sínum og íslensk tónlist hefur til dæmis haft mikil áhrif á það að svo margir telja Ísland áhugverðan áfangastað.

Menntamálin og mannréttindamálin en ég er formaður Mannréttindaráðs borgarinnar. Við höfum verið að vinna að viðamiklum verkefnum á þessu kjörtímabili og má þar einkum nefna jafnréttismálin, málefni innflytjenda, málefni barna og annarra hópa sem heyra undir mannréttindastefnuna. Stigið var stórt skref þegar verkefnaáætlun í málefnum Innflytjenda var samþykkt í fyrra.

Ýmis verkefni okkar sem lúta að aðlögun innflytjenda hafa skilað umtalsverðum árangri. Má þar nefna foreldranámskeið í grunnskólum þar sem fjallað er um gangverk skólakerfisins og ábyrgð og skyldur kerfisins, nemenda og foreldra. Við höfum einnig boðið aðstoð við heimanám og Frístundakortið hefur aukið þátttöku þeirra í íþrótta- og tómstundastarfi. Við höfum líka verið að þróa nýjar leiðir varðandi móttöku nýrra íbúa í Reykjavík en hugsunin er sú að það er sama hvort þú komir frá Raufarhöfn eða Asíu, áttu að geta gengið að ákveðnum upplýsingum um réttindi þin og skyldur.

Vegna menntunar minnar er ég eðli málsins samkvæmt áhugasöm um skólamál. Þar hef ég verið að leiða leikskólamálin og hef haft þau markmið að auka val og fjölbreytni og tryggja jafnræði á milli barna. Við höfum fjölgað um þrjá leikskóla á þessu kjörtímabili og búið til ungbarnaleikskóla. Við höfum aukið niðurgreiðslur með dagforeldrabörnum, innleitt þjónustutryggingu og samþætt hvaða peningar fylgja barninu í leikskólanum óháð því hvaða rekstrarform foreldrar velja. Ég hef verið einbeitt í að tryggja að sérkennslan sé líka gegnsæ. Búið er að gera sérkennslustefnu sem er opin fyrir alla og við höfum aukið mjög fjármagn til þeirra barna sem þurfa á aðstoð að halda.

Ég er mjög áhugasöm um velferðarmál. Ég sóttist eftir því að verða formaður Velferðarráðs og hef stýrt þeim málaflokki allt þetta kjörtímabil. Mikilvæg mál hafa gengið eftir, eins og að sameina heimahjúkrun og heimaþjónustu, sem var stærsta sameining á sviði ríkis og sveitarfélags sem um getur, enda mjög stór málaflokkur. Nú er verið að undirbúa að málefni fatlaðra flytjist yfir til sveitafélagsins og auk þess höfum við gert breytingar á félagslega leiguíbúðakerfinu og gert stuðninginn einstaklingsbundnari en áður var. Einnig höfum við gert breytingar varðandi utangarðsfólkið. Við fórum í að meta þörfina, styðja við þau úrræði sem fyrir voru og setja ný af stað eins og koma á nýju dagvistarúrræði. Við höfum farið í algjöra stefnumótun í málaflokknum.

Umhverfis-, samgöngu- og skipulagsmál. Þessi mál eru öll nátengd og þurfa að vera það til að við getum byggt upp góða borg.

Stóra verkefnið í þessum málaflokki eru Grænu skrefin. Við unnum stíft að undirbúningnum fyrsta árið eftir að við tókum við borginni og kynntum þau vorið 2007. Það hefur gengið vonum framar að hrinda þeim í framkvæmd og við erum búin að klára 95% af Grænu skrefunum og höfum meira að segja sett okkur ný markmið sem munu ná inn á næsta kjörtímabil. Allt hefur þetta verið unnið í samvinnu allra flokka og skipt miklu fyrir borgina.

Hver eru helstu málefni þín innan borgarinnar?

Nærtækast eru þau mál sem ég hrærist í frá degi til dags, þ.e fjölskyldumálin. Ég vil að borgarbúar séu ánægðir með sína borg og séu sáttir og líði vel að búa í Reykjavík. Íþrótta-, mennta- og æskulýðsmál standa mér einnig nærri. Ég vil sjá breytingar í menntamálum þar sem stuðlað er m.a. að aukinni hreyfingu barna og að betur sé tekið á næringu þeirra í skólum. Mér finnst auk þess mikilvægt að styrkja hvert hverfi fyrir sig enn frekar, þannig að fólk þurfi ekki að leita langt eftir þjónustu, hvort sem um er að ræða íþróttir, verslun, skóla eða tómstundamál. Að í hverju hverfi sé í raun allt til alls. Sömuleiðis er brýnt að huga að atvinnumálum í borginni því það er auðvitað áhyggjuefni að um 10% Reykvíkinga eru án atvinnu í dag.

Ég er formaður menntaráðs og Íþrótta- og tómstundaráðs og eru þessir málaflokkar því skiljanlega efst á baugi hjá mér en orkumál og umferðarmál eru mér einnig ofarlega í huga. Á kjörtímabilinu hef ég lagt mikla áherslu á samþættingu skóla- og frístundastarfs og koma þannig á samfelldum skóladegi barna í Reykjavík. Þetta höfum við gert með frekari samvinnu margra aðila þar sem nám og kennsla, hvíld og tómstundir, íþróttaiðkun, frístundaheimili, tónlistarnám og fleira vinnur saman. Ég er mjög ánægður með að tekist hefur að eyða biðliðstum fyrir frístundaheimili sem 6-9 ára börn sækja að loknum skóladegi og er það í fyrsta sinn sem það hefur tekist frá opnun þeirra árið 2002. Í menntamálum hefur megináhersla verið lögð á að láta gæði kennslunnar haldast þrátt fyrir fjármálakreppu og mikla hagræðingu. Ég tel að það hafi tekist vel sem sést m.a. á því að ánægja foreldra með skólastarf í Reykjavík hefur aukist. Þá hefur þátttaka í starfi íþróttafélaga og í almenningsíþróttum aukist verulega á síðastliðnum misserum sem er auðvitað einnig ánægjulegt.

Hver eru helstu málefni þín innan borgarinnar?

Fyrri hluta kjörtímabilsins var ég formaður menntaráðs og nú er það formennska í skipulagsráði sem á hug minn.

Við munum ekki hækka skatta. Það er mikilvægt framlag borgarinnará þessum erfiðu tímum fyrir marga borgarbúa. Ég hef heyrt að sumir telji þessa fullyrðingu ekki trúverðuga í aðdraganda kosninga. Ég skil vel að sú umræða fari af stað, enda hræða sporin í þeim efnum og þarf ekki að leita langt til að sjá það. Þriggja ára fjárhagsáætlun borgarinnar sýnir þó einmitt að skattar verða ekki hækkaðir og störf okkar á þessu kjörtímabili ættu að staðfesta það einnig. Á vettvangi skipulagsmála erum við að undirbúa endurreisnina með því að vera tilbúin með skipulagsáætlanir íbúða- og atvinnusvæða, þannig að ekki þurfi að bíða eftir þeirri vinnu þegar áhugi á uppbyggingu fer að glæðast. Við höfum skipulagt stórt atvinnusvæði sem bíður og verður fullgert þegar atvinnulífið fer að taka við sér. Á sama tíma verðum við að vera skjót til og aðstoða þá sem til okkar leita. Við verðum að vera minnug þess að fjármagns- og rekstrarkostnaður er það hár að mörg fyrirtæki þola ekki bið. Hjá Faxaflóahöfnum höfum við opnað fyrir að smærri fyrirtæki geti komið með starfsemi sína niður að höfn í gömlu verbúðirnar til þess að efla nýsköpun og auðga mannlíf við gömlu höfnina. Við lánuðum ungu fólki sem stendur að Hugmyndahúsinu 2.500 fermetra skemmu sem stóð auð og nýtist nú með nýjum hætti. Sprotafyrirtæki þurfa vettvang til að þróa áfram áhugaverðar hugmyndir sem geta orðið arðbærar og verið drifkraftur uppbyggingar í framtíðinni.

Hver eru helstu málefni þín innan borgarinnar?

Ég hef áhuga á atvinnulífinu og tel það vera mikilvægan málaflokk. Þó að það sé ekki endilega hins opinbera að búa til öll verkefnin þá má ekki gleyma því að við verðum að búa til atvinnuskapandi umhverfi í borginni. Það er okkar að búa til kræsilegt umhverfi til að stofna fyrirtæki. Fólk með hugmyndir og dirfsku getur búið til eitthvað stórkostlegt og við berum ábyrgð á því að hlúa að þeim verkefnum. Það er einnig stutt í áhuga á félagsmálum og ungmennum þar sem ég vann í mörg ár í Hinu Húsinu sem einn af frumkvöðlum Jafningjafræðslunnar. Á undanförnum mánuðum hef ég auk þess verið að kynna mér beint lýðræði. Mér þykir það mjög spennandi vettvangur og öflugt skref í átt til aukins lýðræðis og er mjög spennt fyrir því að skoða það mál frekar.