Ályktun um viðskipta- og neytendamál

1. Íslenskt atvinnulíf og stjórnkerfi þarf að ávinna sér traust og virðingu að nýju innanlands sem utan. Við Íslendingar verðum að standa þétt saman á þessum erfiðu tímum og vinna að uppbyggingu til framtíðar.
2. Með skynsamlegri nýtingu auðlinda og tækifærum til nýsköpunar verður hagsmunum atvinnulífsins, launafólks og neytenda best borgið. Við þurfum að nýta reynsluna en ekki láta erfiðleika hneppa okkur í fjötra einangrunar og fábreytni. Afturhvarf til aukinna ríkisafskipta og hafta á frjáls viðskipti er leið ótta og vonleysis. Ný framtíðarsýn þarf að byggjast á grunngildum sjálfstæðisstefnunnar: frelsi, manngildi og skýrum leikreglum.
3. Almenningur og fyrirtækin í landinu eru í miklum vanda og mikilvægt er að íþyngja þeim ekki frekar með flóknara regluverki og auknum álögum. Tryggja þarf rekstrargrundvöll fyrirtækja í landinu því þau eru undirstaða atvinnu og velmegunar. Fyrirtæki og heimili þurfa stöðugleika  þar sem unnt er  að gera raunhæfar áætlanir til framtíðar.
4. • Samkeppnishæfur íslenskur iðnaður, framleiðsla, verslun og þjónusta skapa bæði atvinnu og gjaldeyri. Öflug staða atvinnuveganna er mikilvægasti bakhjarl íslensku þjóðarinnar.
   • Standa þarf vörð um samkeppni, nú þegar auknar líkur eru á samruna fyrirtækja sem eru starfandi í sömu atvinnugreinum til að koma í veg fyrir einokun og fákeppni og stuðla að hagstæðu vöruverði fyrir neytendur.
   • Mörg fyrirtæki hafa lent og munu lenda í eigu banka. Nauðsynlegt er að bankarnir upplýsi um fyrirtæki í þeirra eigu og setji þau í opinbert söluferli. Lágmarka þarf þann tíma sem fer í það ferli og tryggja gegnsæi.

Aðgerðir

• Endurskoða  þarf  tolla og vörugjöld til hagsbóta fyrir neytendur. .
• Afnema þarf gjaldeyrishöft sem fyrst. Frjáls gjaldeyrisviðskipti eru grundvöllur heilbrigðra viðskipta, atvinnu í landinu og aukins innstreymis  fjármagns.
• Mikilvægt er að vextir lækki.
• Lög og reglur í viðskiptalífi og á neytendamarkaði þurfa að vera einfaldar, skýrar og gegnsæjar og eftirlitsstofnanir skilvirkari.
• Styrkja þarf starfsemi banka og tryggja dreift eignarhald þeirra.
• Koma þarf í veg fyrir kennitöluflakk með markvissum aðgerðum
• Mikilvægt er að endurskoða strax stefnuna í peningamálum þjóðarinnar með það að markmiði að auka stöðugleika.
• Efla þarf samkeppnis- og skattaeftirlit.

·      Strax á næsta þingi verði lagt fram frumvarp til laga um tímabundna flutningsjöfnunarstyrki